თეთრი ხალათების ცერემონია 2017
კომენტარი (0) გაზიარება (0)

თბილისის სახელმწიფო სამედიცინო უნივერსიტეტში დიპლომირებული მედიკოსის ამერიკული პროგრამის „თეთრი ხალათების ცერემონია 2017“ გაიმართა 20 სექტემბერს თბილისის სახელმწიფო სამედიცინო უნივერსიტეტის დიპლომირებული მედიკოსის ამერიკული პროგრამის „თეთრი ხალათების ცერემონია“ გაიმართა. „თეთრი ხალათების ცერემონია“ თბილისის სახელმწიფო სამედიცინო უნივერსისტეტში განსაკუთრებული დატვირთვის მატარებელია: მედიცინის ფაკულტეტის სტუდენტებისთვის თეთრი ხალათი წარმატებული სამედიცინო კარიერისა და ექიმის შეუბღალავი ავტორიტეტის სიმბოლოს წარმოადგენს. გასული წლების მსგავსად, თეთრი ხალათების რიგით მეხუთე ცერემონია გაცილებით პომპეზური იყო. საზეიმო მიღება საქართველოსა და ამერიკის ჰიმნებით და, ტრადიციულად, თსსუ-ის რექტორის მიმართვით გაიხსნა.

ღონისძიების ფარგლებში მოწვეულმა საპატიო სტუმრებმა აუდიტორიას სიტყვით მიმართეს და პირველსემესტრელებს ცხოვრების ეს მნიშვნელოვანი ეტაპი მიულოცეს. 2023 წლის გამოშვების სტუდენტების საზეიმო მიღებას წელს კენეტ ვოლკერი არ დასწრებია, ემორის უნივერსიტეტის მედიცინის სკოლის პროფესორმა სტუდენტებსა და საპატიო სტუმრებს სპეციალური ვიდეომიმართვა აშშ-დან გამოუგზავნა. მან წარმატებები უსურვა პირველსემესტრელებს და პროგრამის განვითარებისთვის მადლობა გადაუხადა თსსუ-ის რექტორსა და პროგრამის ხელმძღვანელ პირებს.

პროგრამის პირველკურსელები, ტრადიციულად, თსსუ-ისა და ამერიკული პროგრამის ემბლემიანი თეთრი ხალათებით შემოსეს თბილისის სახელმწიფო სამედიცინო უნივერსიტეტის რექტორმა, პროფესორმა ზურაბ ვადაჭკორიამ; საქართველოს შრომის, ჯანმრთელობისა და სოციალური დაცვის მინისტრმა დავით სერგეენკომ; ამერიკის შეერთებული შტატების ელჩმა საქართველოში იან კელიმ; აშშ-ს არმიის სამედიცინო კვლევის დეპატრტამენტის ქიმიური თავდაცვის ვიცე-სარდალმა ვიცე-პოლკოვნიკმა მარკ ჰარტელმა და ღონისძიებაზე, თსსუ-ის ვიცე-რექტორმა პროფესორმა რიმა ბერიაშვილმა, შონ დარიუშნიამ - ემორის უნივერსიტეტის მედიცინის სკოლის ინერვენციულმა რადიოლოგმა, როლანდ მეთიუმ - მორჰაუსის მედიცინის სკოლის მეანობა-გინეკოლოგიის დეპარტამენტის ხელმძღვანელმა და სხვა საპატიო მოწვეულმა სტუმრებმა როგორც აშშ-დან, ისე საქართველოდან. საზეიმო ცერემონიას პროგრამის ხელმძღვანელი, ემორის უნივერსიტეტის მედიცინის სკოლის საერთაშორისო სტუდენტური პროგრამების დირექტორი არჩილ უნდილაშვილი უძღვებოდა.

პროგრამაში შეტანილი განსაკუთრებული წვლილისათვის ცერემონიაზე თსსუ დიპლომირებული მედიკოსის ამერიკული პროგრამის ჯილდო გადაეცათ ვიცე-პოლკოვნიკ მარკ ჰაერტელსა და პროგრამის დირექტორს, ეკა ეკალაძეს.

საზეიმო მიღებას თბილისის სახელმწიფო სამედიცინო უნივერსიტეტის პროფესორ-მასწავლებლები, უცხოელი სტუმრები, თსსუ დიპლომირებული მედიკოსის ამერიკული პროგრამის სტუდენტები, მშობლები და მეგობრები დაესწრნენ. მათ შორის იყვნენ აშშ-დან დაბრუნებული მეორე კურსის სტუდენტები, რომლებიც ერთი თვის განმავლობაში ემორის უნივერსიტეტის სამედიცინო სკოლაში მონაწილეობას იღებდნენ სპეციალურ პროგრამაში - „ზაფხული ემორიში“.

ღონისძიების დასასრულს, თეთრი ხალათების 2017 წლის ცერემონიის პომპეზური საზეიმო ტორტი პროფესორმა ზურაბ ვადაჭკორიამ, იან კელიმ და დავით სერგეენკომ გაჭრეს, შემდეგ კი სტუდენტებთან ერთად სამახსოვრო ფოტოები გადაიღეს.

2017 წელს პროგრამაზე მეხუთე ნაკადი, 120-მდე სტუდენტი ჩაირიცხა. თსსუ-ში „თეთრი ხალათების ცერემონიის" დასრულების შემდეგ საპატიო სტუმრებმა თსსუ-ის რექტორთან, კანცლერთან, ვიცე-რექტორებთან და ამერიკული პროგრამის ხელმძღვანელ პირებთან ერთად საქართველოში აშშ ელჩის, იან კელის მიწვევით ედუარდ კურტისის ნამუშევრების გამოფენის გახსნაზე აბრეშუმის სახელმწიფო მუზეუმში გადაინაცვლეს.